- ભાજપના રાષ્ટ્રીય અધ્યક્ષ જેપી નડ્ડા પણ રાજ્યમાં 15 થી વધુ રેલીઓ કરશે

સુરત, તા. 19 નવેમ્બર 2022, શનિવાર

ગુજરાત વિધાનસભાની ચૂંટણીના ગણતરીના દિવસો બાકી રહ્યા છે ત્યારે સત્તારૂઢ ભારતીય જનતા પાર્ટી હવે તેના પ્રચારની ચરમસીમા પર છે અને તેનું નેતૃત્વ કરવા માટે તેના સૌથી લોકપ્રિય ચહેરાને મેદાનમાં ઉતારવા જઈ રહી છે. આ વ્યૂહરચના હેઠળ વડાપ્રધાન નરેન્દ્ર મોદી આગામી એક અઠવાડિયામાં રાજ્યભરમાં લગભગ 25 રેલીઓ કરવાના છે. આ રેલીઓ આજે સાંજથી શરૂ થઈ રહી છે. વડાપ્રધાન મોદી પોતાના ગૃહ રાજ્યના ત્રણ દિવસના પ્રવાસે આવી રહ્યા છે. શનિવારે સાંજે વડાપ્રધાન વલસાડમાં રેલીને સંબોધશે.

બીજા દિવસે પીએમ મોદી સોમનાથ મંદિરની મુલાકાત લેશે અને ત્યારબાદ સૌરાષ્ટ્ર વિસ્તારમાં ચાર રેલીઓને સંબોધશે. આ ચાર રેલીઓ વેરાવળ, ધોરારજી, અમરેલી અને બોટાદમાં યોજાશે. ગત વિધાનસભાની ચૂંટણીમાં સૌરાષ્ટ્રની આ વિધાનસભા બેઠકોમાં ભાજપ એક પણ બેઠક જીતી શકી ન હતી. ગત ચૂંટણીમાં કોંગ્રેસનો આ ગઢ ભાજપ તોડી શકી ન હતી.

ત્રીજા દિવસે પીએમ મોદી સુરેન્દ્રનગર, ભરૂચ અને નવસારીમાં ત્રણ રેલી કરશે. ભરૂચ કોંગ્રેસના દિગ્ગજ નેતા અહેમદ પટેલનો મતવિસ્તાર છે જ્યારે ભાજપના પ્રદેશ પ્રમુખ સી.આર.પાટિલ લાંબા સમયથી ચૂંટણી જીતતા આવી રહ્યા છે. પીએમ મોદી ઉપરાંત કેન્દ્રીય ગૃહ મંત્રી અમિત શાહ જેઓ ગુજરાતના છે અને ભાજપના રાષ્ટ્રીય અધ્યક્ષ જેપી નડ્ડા પણ રાજ્યમાં 15 થી વધુ રેલીઓ કરવાના છે.

પાર્ટીએ પહેલાથી જ ભાજપ શાસિત રાજ્યોના મુખ્યમંત્રીઓ સહિત 40 નેતાઓની સ્ટાર પ્રચારક યાદી તૈયાર કરી છે. તેઓ ઓછામાં ઓછા 2-3 દિવસ માટે પ્રચાર કરે તેવી પણ અપેક્ષા છે જે દરમિયાન તેઓ ઓછામાં ઓછી 2-3 રેલીઓ કરશે. ઉત્તર પ્રદેશના મુખ્યમંત્રી યોગી આદિત્યનાથ અને આસામના મુખ્યમંત્રી હિમંતા બિસ્વા સરમાના ચૂંટણી પ્રચારમાં ઉમેદવારોની ભારે માંગ છે.

40-સ્ટાર પ્રચારકો ઉપરાંત ભાજપે દરેક વિધાનસભા મતવિસ્તાર પર ધ્યાન કેન્દ્રિત કરીને રાજ્યભરમાં સાંસદો અને ધારાસભ્યોને પ્રતિનિયુક્ત કર્યા છે. ઉત્તર પ્રદેશના નાયબ મુખ્ય મંત્રીઓ કેશવ પ્રસાદ મૌર્ય અને બ્રિજેશ પાઠક જેવા લોકપ્રિય નેતાઓથી લઈને બિહારના નીતિન નવીન સુધી અને પાર્ટીના વરિષ્ઠ સાંસદો જેમ કે, રાધા મોહન સિંહ, નિશિકાંત દુબે, સત્ય પાલ સિંહ અને અન્ય લોકો પહેલેથી જ રાજ્યમાં ધામા નાખી ચૂક્યા છે.

2017ની ગુજરાત ચૂંટણીમાં ભાજપે કુલ 182 બેઠકોમાંથી 99 બેઠકો જીતી હતી. પાર્ટી છેલ્લા 27 વર્ષથી રાજ્યમાં સત્તા પર છે અને નરેન્દ્ર મોદી રાજ્યના સૌથી લાંબા સમય સુધી સેવા આપતા મુખ્યમંત્રી રહ્યા છે. આ વખતે પીએમ મોદી, અમિત શાહ અને સીઆર પાટીલના નેતૃત્વમાં પાર્ટીએ વધુમાં વધુ 140થી વધુ બેઠકો હાંસલ કરવાનું લક્ષ્ય રાખ્યું છે.