લેન્ડ ફોર જોબ સ્કેમ મામાલે રાષ્ટ્રીય જનતા દળ(આરજેડી)ના સુપ્રીમો લાલુ પ્રસાદ યાદવ અને રાબડી દેવી બાદ સીબીઆઈ હવે બિહારના ઉપમુખ્યમંત્રી તેજસ્વી યાદવની પણ પૂછપરછ કરશે. તેમને પણ સમન્સ મોકલાયું છે. આ મામલે મુખ્યમંત્રી નીતીશ કુમારે મૌન તોડતાં કહ્યું કે લાલુ પ્રસાદ યાદવનો પરિવાર આ તમામ મામલે જવાબ આપી રહ્યો છે. પહેલા પણ આ પ્રકારની કાર્યવાહી થઈ હતી. હવે જેડીયુ અને આરજેડી ફરી એકજૂટ છે એટલા માટે જ દરોડાની કાર્યવાહી કરવામાં આવી રહી છે. 

નીતીશે કહ્યું ચિંતા ન કરશો 

તેજસ્વી યાદવ અને તેમના પરિવારના અન્ય સભ્યોના ઠેકાણે ઈડીના દરોડા અંગે મુખ્યમંત્રી નીતીશ કુમારે કહ્યું કે એ લોકો તો જવાબ આપી રહ્યા છે.  અગાઉ પણ આવી 2017માં કાર્યવાહી થઈ હતી અને હવે ફરી થઇ રહી છે. મીડિયાએ આ દરમિયાન નીતીશ કુમારને સવાલ કર્યો કે ફરી ગઠબંધન તૂટશે એવી ચર્ચા ચાલી રહી છે. તેના પ રમુખ્યમંત્રી નીતીશ કુમારે કહ્યું કે એવું કંઈ જ નથી. તમે લોકો ચિંતા ન કરશો. 

મામલો શું છે? 

આ મામલો લાલુ પ્રસાદના 2004થી 2009 વચ્ચે રેલવેમંત્રી પદે રહેવા દરમિયાનનો છે. આરોપ છે કે તેમણે જમીન લઈને બે ડઝનથી વધુ લોકોને રેલવેમાં ગ્રૂપ સી અને ડીમાં નોકરીઓ આપી હતી. આ મામલે ઈડીએ સીબીઆઈની એફઆઈઆરને આધાર બનાવતા મની લોન્ડરિંગનો કેસ નોંધ્યો છે.