જોશીમઠ, તા. 16 જાન્યુઆરી 2023, સોમવાર 

ઉત્તરાખંડના જોશીમઠ વિસ્તારમાં અનેક મકાનોમાં લાંબી તિરાડો પડી ગઇ છે. આ સમગ્ર વિસ્તાર જમીનમાં સરકી રહ્યો હોવાથી મકાનોમાં તિરાડો પડી રહી હોવાનો લોકો દાવો કરી રહ્યા છે. આ પરિસ્થિતિ વચ્ચે સરકાર આ વિસ્તારને ખાલી કરાવવાની પ્રક્રિયા શરૂ કરી ચુકી છે અને મુખ્યમંત્રી પુષ્કર ધામીએ લોકોને ખાતરી આપી છે કે જેમના પણ મકાન ખાલી કરાવવામાં આવ્યા છે જો કે તેમને બજારની કિમતના આધારે જ વળતર આપવાની વાત પણ કરી છે. 

જોશીમઠ વિસ્તારમાં જે લોકોના મકાન વધુ ભયજનક સ્થિતિમાં છે તેમને સુરક્ષિત સ્થળે ખસેડવામાં આવ્યા છે. બીજી તરફ લોકોનો આરોપ છે કે આ વિસ્તારમાં જે ટનલ બનાવવામાં આવી છે તેને કારણે જમીન સરકી રહી છે અને મકાનો તુટી રહ્યા છે. જોકે આ દાવાને એનટીપીસીએ નકારી દીધો છે, અધિકારીઓએ મંત્રાલયને એક રિપોર્ટ સોપ્યો છે તેમાં કહ્યું છે કે જે વિસ્તારમાં મકાન તુટી રહ્યા છે તે વિસ્તાર ટનલથી એક કિમી દૂર છે અને આ વિસ્તારથી ટનલ જમીનમાં ૬૦૦ મિટર નીચે છે. તેથી ટનલને કારણે આ વિસ્તારમાં તિરાડો નથી પડી રહી.

ઉત્તરાખંડના જોશીમઠમાં આજે બે હોટલો એક બીજા તરફ નમી ગઈ છે. આ બન્ને હોટલો પહેલા 4 ફુટ દુર હતી જે હવે તે ખુબ નજીક આવી જતા બન્ને વચ્ચે માત્ર થોડા ઈંચનું અંતર રહ્યુ છે. આ બન્નેની છતનો ભાગ લગભગ એકબીજા ટકરાવાની તૈયારીમાં છે. એટલે કે આ બન્ને હોટલો ગમે ત્યારે એકબીજા સાથે ટકરાઈ શકે છે. 

સલામતીના ભાગરુપે આ બન્ને હોટલો તાત્કાલિક ખાલી કરાવી દેવામાં આવી છે. આ બન્ને હોટલો એ જગ્યા પર છે કે જ્યા હોટલ મલારીઈન અને માઉન્ટ વ્યુથી લગભગ 100 મીટર જ દુર છે.