કોંગ્રેસે ચોમાસુ સત્ર દરમિયાન કેન્દ્ર સરકારને ઘેરવાની સંપૂર્ણ તૈયારી કરી લીધી છે. કોંગ્રેસની યાદીમાં મણિપુર હિંસાનો મુદ્દો સૌથી મહત્વનો છે. કોંગ્રેસના નેતા જયરામ રમેશે કહ્યું કે અમે ગૃહમાં કેટલાક મુદ્દાઓ પર ચર્ચા કરવા માંગીએ છીએ. પહેલો મુદ્દો મણિપુરનો છે. અમે ઈચ્છીએ છીએ કે વડાપ્રધાનની હાજરીમાં મણિપુરની સ્થિતિ પર ચર્ચા થાય. 

સંસદનું ચોમાસુ સત્ર 20 જુલાઈથી શરૂ થશે 

સંસદનું ચોમાસુ સત્ર 20 જુલાઈથી શરૂ થશે અને 11 ઓગસ્ટ સુધી ચાલશે. તે જ સમયે, ચોમાસુ સત્ર દરમિયાન, કેન્દ્ર સરકાર UCC બિલને ગૃહમાં લાવવાની યોજના બનાવી રહી છે. આવી સ્થિતિમાં મોદી સરકાર માટે UCC બિલ પાસ કરવું આસાન નહીં હોય, કારણ કે કોંગ્રેસ જ્યારે આ નવ મુદ્દાઓ પર ચર્ચાની માંગ કરશે ત્યારે સ્વાભાવિક છે કે સંસદનું ચોમાસુ સત્ર ઘણું તોફાની બની જશે.

જયરામ રમેશે આપી માહિતી 

કોંગ્રેસના નેતા જયરામ રમેશે કહ્યું કે સંઘીય માળખું, ચૂંટાયેલી સરકારો પર મોદી સરકાર અથવા મોદી સરકાર દ્વારા નિયુક્ત વ્યક્તિઓ દ્વારા પ્રત્યક્ષ અને આડકતરી રીતે હુમલો કરવામાં આવી રહ્યો છે. અમે તેનો વિરોધ કરતા આવ્યા છીએ અને કરતા રહીશું. જયરામ રમેશે જણાવ્યું કે આજે અમારા 'પાર્લામેન્ટરી સ્ટ્રેટેજી ગ્રુપ'ની બીજી બેઠક યોજાઈ હતી. આ બેઠકમાં અમે ચોમાસુ સત્ર વિશે વિસ્તૃત ચર્ચા કરી હતી. તેમણે કહ્યું કે અમે સંસદમાં જે મુદ્દા ઉઠાવવાના છે તેના પર અમે ચર્ચા કરી. આ નવ મુદ્દા છે જેના પર અમે ચર્ચા કરવા માંગીએ છીએ.

મણિપુર ચર્ચા

મણિપુરમાં 3 મેથી કુકી અને મૈતેઈ સમુદાયો વચ્ચે હિંસા ચાલી રહી છે. આ હિંસામાં અત્યાર સુધીમાં 150 થી વધુ લોકોના મોત થયા છે, ઘણા ઘાયલ થયા છે અને સેંકડો રાજ્ય છોડીને ભાગી ગયા છે. આ અંગે રાહુલ ગાંધીએ શનિવારે ટ્વિટ કરીને પીએમના મૌન પર નિશાન સાધ્યું હતું.

રેલવે સુરક્ષા અંગે ચર્ચા

2 જૂનના રોજ, ઓડિશાના બાલાસોરમાં એક ભયાનક ટ્રેન અકસ્માતમાં 292 લોકો માર્યા ગયા હતા. અકસ્માતની તપાસ કરી રહેલી સીબીઆઈએ આ મામલે કાર્યવાહી કરતા ત્રણ રેલવે કર્મચારીઓની ધરપકડ કરી છે. આ કર્મચારીઓની આઈપીસી કલમ 304 હેઠળ ધરપકડ કરવામાં આવી છે. આ અકસ્માતમાં ત્રણ ટ્રેનો એકબીજાની અડફેટે આવી ગઈ હતી. દુર્ઘટના બાદ કોંગ્રેસ સહિત અનેક વિપક્ષી દળોએ રેલ્વે મંત્રીના રાજીનામાની માંગ કરી હતી. તેમજ રેલ સુરક્ષા અંગે પણ સવાલો ઉઠાવ્યા હતા.

સંઘીય માળખા પર હુમલા પર ચર્ચા

કોંગ્રેસના નેતા જયરામ રમેશે આજે કહ્યું હતું કે મોદી સરકાર અથવા મોદી સરકાર દ્વારા નિયુક્ત વ્યક્તિઓ દ્વારા સંઘીય માળખું, ચૂંટાયેલી સરકારો પર પ્રત્યક્ષ અને આડકતરી રીતે હુમલો કરવામાં આવી રહ્યો છે. અમે તેનો વિરોધ કરતા આવ્યા છીએ અને કરતા રહીશું.

GSTને PMLA હેઠળ લાવવા પર ચર્ચા

કેન્દ્રીય નાણા મંત્રાલયે GSTને PMLA હેઠળ મૂક્યો છે. જેના કારણે નાના વેપારીઓમાં ભયનો માહોલ સર્જાયો હતો. અખિલ ભારતીય ઉદ્યોગ વેપારી મંડળે વાણિજ્ય કર વિભાગના ડેપ્યુટી કમિશનરને વડાપ્રધાનને સંબોધિત એક મેમોરેન્ડમ સુપરત કર્યું છે. સંગઠને માંગ કરી છે કે GSTને PMLA હેઠળ ન લાવવો જોઈએ. કોંગ્રેસે આ અંગે ચર્ચા કરવાની વાત કરી છે.

મોંઘવારી પર ચર્ચા

ગેસ, પેટ્રોલ અને ડીઝલના ભાવ આસમાને છે. રોજબરોજની તમામ વસ્તુઓ મોંઘી થઈ ગઈ છે. કોંગ્રેસ વધતી મોંઘવારીને લઈને સરકાર પર પ્રહારો કરતી હોવા છતાં આ વખતે પાર્ટીએ મોનસૂન સત્ર દરમિયાન મોંઘવારી પર ચર્ચા કરવાની રણનીતિ બનાવી છે.

યુપીએ સરકારની યોજનાઓને નબળી બનાવવા પર ચર્ચા

કોંગ્રેસ પાર્ટીનું માનવું છે કે જે યોજનાઓ યુપીએ સરકાર દરમિયાન શરૂ કરવામાં આવી હતી. વર્તમાન મોદી સરકાર તે યોજનાઓને નબળી કરી રહી છે.

મહિલા કુસ્તીબાજોની સતામણી અંગે ચર્ચા

કોંગ્રેસ ચોમાસુ સત્રમાં મહિલા પાલવાનની સતામણીનો મુદ્દો ઉઠાવશે. કોંગ્રેસ પાર્ટી આ અંગે કેન્દ્ર સરકારને અનેક સવાલો પૂછી શકે છે.

અદાણી કેસ પર જેપીસીની માંગ

વિપક્ષ અદાણી-હિંડનબર્ગ કેસની તપાસ માટે કેન્દ્ર સરકાર પાસે સંયુક્ત સંસદીય સમિતિ (જેપીસી)ની સતત માંગ કરી રહ્યો છે. 24મી જાન્યુઆરીએ અમેરિકન ફર્મ હિંડનબર્ગ રિસર્ચે અદાણી ગ્રૂપ અંગે એક અહેવાલ પ્રકાશિત કર્યો હતો. આ રિપોર્ટમાં અદાણી ગ્રુપ પર એકાઉન્ટિંગ ફ્રોડ અને સ્ટોક મેનીપ્યુલેશન જેવા અનેક ગંભીર આરોપો લગાવવામાં આવ્યા હતા. આ પછી, અદાણી ગ્રુપના મોટાભાગના શેરોમાં 60% થી વધુનો ઘટાડો થયો હતો.

રાજ્યોના વિવિધ મુદ્દા પર ચર્ચા

કોંગ્રેસ દેશના વિવિધ રાજ્યોના મુદ્દા પર પણ ચર્ચા કરશે.