- કાશ્મીર ખાતે સિલેક્ટિવ કિલિંગની ઘટનાઓ સામે આવ્યા બાદ હવે આતંકવાદીઓ પર મોટી કાર્યવાહીની તૈયારીઓ ચાલુ

નવી દિલ્હી, તા. 11 ઓક્ટોબર, 2021, સોમવાર

જમ્મુ કાશ્મીરમાં સુરક્ષા દળોનું આતંકવાદીઓ વિરૂદ્ધનું ઓપરેશન ચાલી રહ્યું છે. આજે સવારે અનંતનાગ ખાતે એન્કાઉન્ટરમાં એક આતંકવાદીને ઢેર કરવામાં આવ્યો હતો. જોકે હજુ સુધી આતંકવાદીની ઓળખ નથી મળી શકી. કાશ્મીર ઝોનની પોલીસના કહેવા પ્રમાણે આ એન્કાઉન્ટરમાં એક પોલીસકર્મી પણ ઘાયલ થયો છે. 

આતંકવાદીઓ વિરૂદ્ધના ઓપરેશનમાં એક પિસ્તોલ અને એક ગ્રેનેડ જપ્ત કરવામાં આવ્યા છે. અનંતનાગ બાદ બાંદીપોરા ખાતેના એન્કાઉન્ટરમાં એક આતંકવાદીને ઢેર કરવામાં આવ્યો હતો. કાશ્મીર આઈજીના કહેવા પ્રમાણે આતંકવાદીની ઓળખ ઈમ્તિયાઝ અહમદ ડાર તરીકે સામે આવી છે અને તે પ્રતિબંધિત સંગઠન લશ્કર-એ-તૈયબા (ટીઆરએફ) સાથે સંકળાયેલો હતો. તે તાજેતરમાં શાહ ગુંડ ખાતે થયેલી સામાન્ય નાગરિકની હત્યામાં સામેલ હતો. 

જોકે હજુ પણ બાંદીપોરા ખાતે સર્ચ ઓપરેશન ચાલું જ છે અને સુરક્ષા દળોએ મોરચો સંભાળેલો છે. બાંદીપોરા ખાતે એન્કાઉન્ટરની આ બીજી ઘટના છે. અગાઉ કોકરનાગ ખાતે એક આતંકવાદીને ઢાળી દેવામાં આવ્યો હતો. 

#Encounter has started at Gundjahangir, #Hajin area of #Bandipora. Police & Security Forces are on the job. Further details shall follow. @JmuKmrPolice

— Kashmir Zone Police (@KashmirPolice) October 11, 2021

તાજેતરમાં કાશ્મીર ખાતે સિલેક્ટિવ કિલિંગની ઘટનાઓ સામે આવ્યા બાદ હવે આતંકવાદીઓ પર મોટી કાર્યવાહીની તૈયારીઓ ચાલી રહી છે. સુરક્ષા અને ગુપ્તચર એજન્સીઓ પાસેથી કાશ્મીરમાં સક્રિય આતંકવાદીઓનું લિસ્ટ પણ માગવામાં આવ્યું છે.